గుండమ్మ కథ సినిమా | మౌనముగా నీ మనసు పాడిన పాట | తెలుగు పాత పాటలు | Telugu old songs |

పాటలో ఏముంది?

చిత్రం : గుండమ్మ కథ (1962), గీతం : పింగళి, సంగీతం , గానం ఘంటసాల

భాష్యాలకు బాగా అలవాటుపడిపోయాం గానీ, ప్రేమ .... భాష ద్వారా వ్యక్తం అయ్యేదేనా అసలు? కానే కాదు. ఎందుకంటే ప్రేమ అంటే అదో  మహా నిశ్శబ్ద భావోద్వేగం మరి! ప్రేమికులకు కూడా ఆ విషయం తెలిసినా, గత్యంతరం లేక  బాషను ఆశ్రయించక తప్పడంలేదు. ఇక్కడ మరో సత్యాన్ని కూడా చెప్పుకోవాలి!  ఒక అసాధారణ సున్నిత హృదయులకు మాత్రం భాషతో పనిలేకుండానే ఎదుటి వారి భావాలు తెలిసిపోతాయని మౌనర్షులు అనాదిగా చెబుతున్నారు! కాకపోతే, ఆ తరహా సున్నితత్వం పరిపూర్ణ నిశ్శబ్దంలో జీవించే వాళ్లకే సిద్ధిస్తుందని కూడా వారు చెప్పారు! ఈ ప్రేమికుడు అంతటి ఘనుడో ఏమో మరి! తన ప్రేయసి మౌనంగా పాడిన హృదయగీతం ,  తనకు వినిపించిందని చెబుతున్నాడు. ఈ విషయాల గురించి ఎంతో కొంత తెలిసిన మనం అతని మాటను కాదనడం ఎందుకు? అలా ఏమీ ఉండదని అతని మనసును చిన్నబుచ్చడం ఎందుకు? ‘గుండమ్మ కథ’ ( 1962) సినిమా కోసం,  పింగళి రాసిన ఈ పాటలో ఆ మౌనపు మాటలే ధ్వనిస్తున్నాయి.  తనే బాణీ కూర్చి, గానం చేసిన ఈ పాట ఘంటసాల హృదయంలోంచి వెలువడిన అత్యంత మధురమైన ... అరుదైన వాటిలో ఒకటి. అందుకే....ఆరు దశాబ్దాలు గడిచినా రసహృదయుల్ని ఇంకా ఆనంద డోలికల్లో ఓలలాడిస్తూనే ఉంది!!

మౌనముగా నీ మనసు పాడిన....! 

మౌనముగా నీ మనసు పాడిన వేణుగానమును వింటిలే
తెలుపక తెలిపే అనురాగము నీ కనుల నే కనుగొంటిలే
నీ మనసు నాదనుకొంటిలే // మౌనముగా //

మునులెందుకు మౌనంగా ఉంటారు? మాటలు రాక కాదుకదా! మాటల ద్వారా కన్నా వేయింతల లోతైన సత్యాలన్నీ మౌనంలోనే బాగా తెలిసిపోతాయని వాళ్లు అలా ఉండిపోతారు. ఒకవేళ, అడవుల్లో తిరిగే మునుల విషయం మనకెందుకులే అనుకున్నా! సామాన్య మానవ జీవన సత్యాలైనా నిశ్శబ్దంగానే ఉంటాయి మరి!  కాకపోతే తమ మనోభావాల్ని పరస్పరం చేరవేసుకోవడానికి ఏదో ఒక వాహిక అంటూ ఉండాలనుకుని మనిషి భాషను  సృష్టించుకున్నాడు. అయితే ఏమయ్యింది? ఆ ప్రయత్నమంతా  కడవలో సముద్రాన్ని నింపే వృధా ప్రయాసే అయ్యింది. ఎందుకంటే,  తన  భావోద్వేగాల్లో ఏ వెయ్యోవంతో మాత్రమే భాష ద్వారా వ్యక్త్తమవుతున్నాయి. ఇది నిరాశా జనకమే! నిస్సంశయంగా అదొక విఫల ప్రయత్నమే ... కాదనలేము!  అయినా తప్పదు కదా! భాష లేకుండానే భావాలు తెలుసుకునేటంత, సున్నితత్వాన్ని సాధించడం అందరికీ సాధ్యం అవుతుందా ఏమిటి? ! ఇంతకూ ఆ అమ్మాయి మౌనాన్ని ఎందుకు ఆశ్రయించినట్లు? దాన్ని బట్టి ... తన అనురాగాన్ని పూర్తి స్థాయిలో అభివ్యక్తం చేయడానికి ఇంకా ఆమె సిద్ధపడలేదనే కదా అర్థం? అందుకే మౌనంగా కొంత... కళ్లతో కొంత బయటపెడుతోంది! ఆ మాత్రానికే ఆయన ఆమె మనసు తనదైపోయినట్లు, ఎగిసిపడుతున్నాడు! అబ్బాయిలకు మరీ ఇంత తొందర ఎందుకు? అంటూ నన్నడిగితే నే నేం చెప్పను? ఏమీ చెప్పకుండా,  నేనూ మౌనంగానే ఉండిపోతాను!!

కదిలీ కదలని లేత పెదవుల ... తేనెల వానలు కురిసెనులే
ఆనందముతో అమృత వాహినీ ... ఓలలాడి మైమరిచితిలే // మౌనముగా //

గలగలా మాట్లాడటం అదో స్థితి.... మౌనంగా ఉండిపోవడం అదో స్థితి... అటు ఇటు కాకుండా మాటల్నీ, మౌనాన్నీ కలగలిపి మాట్లాడటం అదో స్థితి. ఈ మూడో స్థితి కాస్త గమ్మత్తుగానే ఉంటుంది. మాట్లాడాలా ... వద్దా అనే మీమాంస ఒకవైపు, ఏం మాట్లాడితే ఏమవుతుందో అన్న రవ్వంత భయం ... ఒక వైపు చేరినప్పుడు ఇలాగే ఉంటుంది! ఒక్కోసారి సిగ్గూ బిడియాలు కూడా మాట పెగలనీయవు. ఏమైనా ఇవన్నీ పెదాలకు పెద్ద పరీక్షలాంటివే  గుండె దిటవు చేసుకుని, అతి కష్టం మీద పెదాలు కదిపినా,  ఆ కదలికలు వింతగానే ఉంటాయి. మాట్లాడే వారికి ముచ్చెమటలు పోస్తుంటే, ఎదుటి వారికి అది ముచ్చటగానే అనిపించవచ్చు. తరళ తరళంగా వచ్చే ఆ మాటలు ఏదో తేనెలు కురిసినట్లే అనిపించవచ్చు!  అదో అమృత ధారలా కూడా అనిపించవచ్చు.  ఆ అమృత వాహినిలో ఓలలాడే వారు ఇక  మైమరిచిపోతే మాత్రం ఆశ్చర్యపోవలసింది ఏముంది? ఒకటి మాత్రం నిజం! ఎన్ని మీమాంసలు ఉన్నా, సిగ్గూ బిడియాలు ఎంతగా కట్టిపడేస్తున్నా, తప్పనిసరిగా చెప్పాల్సిన మాటల్ని చెప్పే తీరాలి! ఎందుకంటే, మౌనంగా ఉండాల్సిన చోట మాట్లాడటం ఎంత ప్రమాదమో, మాట్లాడాల్సిన చోట మౌనంగా ఉండిపోవడం కూడా అంతే ప్రమాదం కదా మరి! 

ముసిముసి నవ్వుల మోముగని, నన్నేలుకొంటివని మురిసితిలే 
రుసరుసలాడుతు విసిరిన వాల్జడ, వలపు పాశమని బెదరితిలే // మౌనముగా //

ఏదో చూసి మరేదో అనుకోవడం... మనుషులకది మామూలే! ఒక రకంగా అది మనిషిని అనాదిగా పీడిస్తున్న మానసిక రుగ్మతే! ఆమె ఏదో మరియాద కోసం మందహాసం చేసిందే అనుకోండి!  అది తనను ఏలుకోవడానికి చేసిన సంకేతమే అనుకుంటే ఎలా? ఉక్కపోతతో చెమట పట్టి మెడంతా చిరాకు పెడుతుంటే, జెడను పక్కకు జరిపే చిన్న ప్రయత్నమేదో చేసిందే అనుకోండి! దాన్ని వలపు పాశమే అనుకోవడం సబబేనా? ఇలాంటి తొందరపాటు ప్రతి స్పందనల వల్లే చాలా మంది యువకిశోరులు అమ్మాయిల దృష్టిలో లోకువైపోతుంటారు. ఒక్కో ముఖ కవళిక వంద రకాల భావాలను చెబుతుంది. ఇది అదేనని, అది ఇదేనని, నువ్వు ఆశించినదేదో  వాళ్లకు ఆపాదించి ఊగిపోతే ఏమిటి అర్థం? జడ విసరడమో, పూలు ఎగజల్లడ మో నిన్ను ఆటపట్టించడానికైనా కావచ్చు కదా! అవన్నీ సరే గానీ, వలపు పాశమని తెలియగానే బెదరిపోయానంటాడేమిటి? కథ అలాగే ముందుకు సాగి పెళ్లి దాకా వెళితే, ఆ బాధ్యతలు ఎవడు మోస్తాడనేనా? ఏదో మాట వరుసకు ఇలా ప్రశ్సిస్తున్నానే గానీ, అంత దాకా వ చ్చిన వాడు బాధ్యతలకు భయపడతాడా? ఏది ఏమైనా వారు ఊహించుకుంటున్నది నూటికి నూరు పాళ్లూ తప్పేనని నేనేమీ అనడం లేదండోయ్‌! అదే అయినా కావచ్చు. అదే  జరిగితే సంతోషమే! ఒకవేళ అలా జరగకపోతేనో...!   ఏదో కారణంగా  కథ అడ్డం తిరిగితేనో ! అది అంతులేని మనస్తాపానికి  గురిచేసే ప్రమాదం కూడా ఉంటుందని చెప్పడమే  నా ఉద్దేశం! అంతే తప్ప ఎవరినీ నిరత్సాహపరిచే తలంపు  నాలో ఏ కోశానా లేదు!  అయినా, వాళ్లనుకున్నదే నిజమైతే నాకైనా, మీకైనా ఏమిటి నష్టం?  పైగా లాభం కూడా! అలా వెళ్లి,  నాలుగు అక్షింతలు వేసి, నిండుగా పెళ్లి భోజనం చేసి బయటపడటంలో , నిజంగా ఎంత సుఖం, ఎంత సంతోషం, ఎంత ఆనందం! తొందరలోనే ఆ శుభదినం రావాలని మనసారా కోరుకుందాం మరి!!

                                                                    - బమ్మెర